लातूर महानगरपालिका निवडणुकीचे आरक्षण जाहीर — राजकीय चित्र बदलले..

लातूर : लातूर महानगरपालिकेच्या आगामी सार्वत्रिक निवडणुकीसाठी प्रभागनिहाय आरक्षण जाहीर करण्यात आले असून, यामुळे शहरातील राजकीय हालचालींना वेग आला आहे. १८ प्रभागांतील ७० जागांसाठी आरक्षण निश्चित झाल्याने अनेक दिग्गज नेत्यांच्या राजकीय गणितात बदल झाला आहे. काही प्रभाग अनुसूचित जाती, जमाती, ओबीसी व महिलांसाठी आरक्षित झाल्याने अनेक इच्छुक उमेदवारांना डावपेच बदलावे लागणार आहेत.

            काँग्रेसचे आमदार अमित देशमुख यांच्यासमोर लातूरमधील वर्चस्व टिकवण्याचे मोठे आव्हान उभे राहिले आहे. तर भाजपचे नेते संभाजी पाटील निलंगेकर यांनी या आरक्षणाला संधी मानत महापालिकेत सत्ता मिळवण्याची तयारी सुरू केली आहे. आरक्षणामुळे काही प्रभाग ‘सेफ’ ठरले असले तरी अनेक माजी नगरसेवकांसाठी ही निवडणूक कठीण ठरणार आहे.

            आरक्षण जाहीर होताच भाजप, काँग्रेस, राष्ट्रवादी काँग्रेस तसेच शिवसेनेत हालचाली वाढल्या असून, उमेदवार निश्चितीसाठी बैठकांवर भर देण्यात येत आहे. आगामी निवडणुकीत आरक्षणाचा थेट परिणाम उमेदवारी, युती-आघाडी आणि निकालांवर होणार असल्याचे स्पष्ट झाले आहे. त्यामुळे लातूर महापालिका निवडणूक यंदा अत्यंत चुरशीची ठरणार आहे.